பேசப் பொருள் இல்லாத
இடைவெளியில் நீ என்னை விட்டுச் சென்றாய் .
எப்போதும் அலையும் என் மனதில்
பாடு பொருளுக்குக் குறைவில்லை .
உனக்காக கோர்த்த வார்த்தைகள்
உன் ஒரு வார்த்தை வேண்டி காத்திருந்தன,
என்னுள்ளே அமிழ்ந்தும்
என்னைப் புறந்தள்ள நினைத்தும் .
நம் இடைவெளிகள் வடிவமைத்தன
என் வார்த்தைகளை .
அவற்றில் இப்போது நீ இல்லை.
உனக்கான காத்திருப்பும் இல்லை.
உருமாறிவிட்ட உன் வெளியை
உனக்கென தந்தபடி
வேறுதிசை நோக்கி எனது பிரவாகம்.
அதில் மிதந்து செல்லும்
சொல்லாமல் விட்ட சில கோடி வார்த்தைகள்
அவை அழிவதற்காய் தோன்றியவை.
